முச்சக்கரவண்டியில் பயணித்த பெண் ஒருவர் முச்சக்கரவண்டி சாரதியை கொல்ல முயற்சி..!

பெண் ஒருவர் முச்சக்கரவண்டியில் ஏறி சாரதியை கொலை செய்துவிட்டு முச்சக்கர வண்டியை கொள்ளையடிக்க முயன்ற சம்பவம் ஒன்று இரத்தினபுரி – கொடகவெல பகுதியில் இடம் பெற்றுள்ளது.முச்சக்கரவண்டி சாரதியின் கழுத்து பகுதியை துணியால் கட்டி அழுத்தியதுடன், முகத்தை மறைத்து கொள்ளையடிக்க முயன்ற குற்றச்சாட்டின் பேரில் குறித்த பெண் பொலிஸாரால் கைது செய்யப்பட்டுள்ளார்.கொடகவெல நகரில் இருந்து முச்சக்கரவண்டியில் ஏறிக்கொண்ட யுவதி, கொடகவெல ரன்வல வீதியில் இரண்டு கிலோமீற்றர் பயணித்த போது முச்சக்கரவண்டி சாரதியின் பின் இருக்கையில் இருந்து முன் இருக்கை வரை கழுத்தில் துணியால் அழுத்தப்பட்டதாக சாரதி பொலிஸாரிடம் தெரிவித்துள்ளார்.

அப்போது முச்சக்கரவண்டியை அவரால் கட்டுப்படுத்த முடியாததால் வீதியில் பயணித்த மோட்டார் சைக்கிள் மீது மோதியதில் முச்சக்கரவண்டி வீதியிலேயே நின்றுள்ளது.அங்கு வந்த கிராம மக்கள் சந்தேகமடைந்த பெண்ணை பிடித்து பொலிஸாரிடம் ஒப்படைத்தனர்.காயமடைந்த முச்சக்கரவண்டி சாரதி கொடகவெல வைத்தியசாலையில் அனுமதிக்கப்பட்டுள்ளார்.சந்தேக நபரான பெண் போதைப்பொருளுக்கு அடிமையானவர் என பொலிஸார் தெரிவிக்கின்றனர்.கொடகவெல பொலிஸார் மேலதிக விசாரணைகளை மேற்கொண்டு வருகின்றனர்.