26 January, 2023

காதலில் ஒரு பெண், ஆணிடமிருந்து எதிர் பார்க்கும் விஷயங்கள்

மாற்றம் ஒன்று மட்டுமே மாறாது என்று சொல்வது போல், மனிதர்கள் மாறிக்கொண்டேதான் இருக்கிறார்கள். அவர்களின் தனிப்பட்ட விருப்பம், காதல், அன்பு, ஆர்வம், தேவை, முக்கியத்துவம், மனநிலை என எல்லாமே மாறிக் கொண்டேதான் இருக்கிறது

அது தனிநபராக இருக்கும்போது ஓகே. ஆனால், திருமணம் போன்ற வாழ்நாள் கமிட்மெண்ட்டுக்குள் செல்லும்போது நிறைய தியாகமும், பொறுமையும் தேவைப்படுகிறது. இந்தியாவில் 100இல் 1 தம்பதி விவாகரத்து பெற்று விடுகிறார்களாம். என்ன எண்ணிக்கை குறைவாக இருக்கிறதே என்று யோசிக்காதீர்கள்.

இந்தியாவில் திருமணம் புனிதமானதாக கருதப்படுவதாலும், காதல் என்றால் தியாகம் என்று சொல்லிக் கொடுக்கப்பட்டதாலும் பல தம்பதிகள் தப்பித்தார்கள். ஆனாலும், பல பெண்கள் சந்தோஷமும், விருப்பமும் இல்லாமல்தான் கணவர்களோடு வாழ்கிறார்கள் என ஆய்வுகள் சொல்கின்றன.

இது அந்த கணவர்களையும் பாதிக்கிறது என்பதும் ஒரு உண்மை. எப்படி, கணவர்கள் நடந்து கொண்டால் திருமண வாழ்க்கை நன்றாக அமையும் என்று பெண்கள் விரும்புகிறார்கள் என்று பார்க்கலாமா?

ஒரு சில காதல் திருமணங்களை தாண்டி, பெரும்பாலும் வீட்டில் பார்த்து நடக்கும் திருமணங்களில் தங்களது எதிர்பார்ப்புகள் குறித்து பேசுவதற்கோ, தங்களின் கனவுகள் ஆசைகள் குறித்து பேசுவதற்கோ வாய்ப்பு கிடைப்பதில்லை. இது இரண்டு எதிர் எதிர் எண்ணங்களை கொண்ட மணமக்களை ஒன்று சேர்த்து விடுகிறது. இதன் விளைவு இரண்டு பேரின் வாழ்க்கையும் வீண்.

எனவே, ஆண்களே நல்ல பிள்ளையாக உங்கள் எதிர்கால வாழ்க்கை நன்றாக அமைய வேண்டும் என்றால் உங்கள் வருங்கால மனைவியிடம் திருமணத்திற்கு முன்பே இதையெல்லாம் பேசி விடுங்கள். இதுதான் இன்பமான வாழ்க்கைக்கு முதல் படி. அவங்களும் ஹாப்பி, நீங்களும் ஹாப்பி.

​உணர்வுகளை மதித்தல்

உங்களுக்கு ஒரு நம்பிக்கை, உணர்வு, உணர்ச்சி, எண்ணம், செயல்பாடு இருப்பது போல், உங்கள் மனைவிக்கும் இருக்கும். அது இரண்டு பேருக்கும் ஒரே மாதிரியாக இருந்தால் சரி. இல்லாத பட்சத்தில் மற்றவரின் உனர்வுகளையும் மதிக்க தெரிந்திருக்க வேண்டும்.

நீங்கள் அதில் ஈடுபடவில்லை என்றாலும், அவர்களின் உணர்வுகளுக்கு மதிப்பு கொடுத்து அவர்கள் போக்கில் விட வேண்டும். பல குடும்பங்களில் கணவர்களின் உணர்வுகளையும் தங்கள் உணர்வாக மனைவிகள் ஏற்று கொள்ள வேண்டிய கட்டாயம் இருப்பதே மனைவிகளை மனஅழுத்தத்திற்குள் தள்ளி விடுகிறது.

சண்டை வந்தால் விட்டு கொடுங்கள்

சண்டைகள் இல்லாத குடும்பமே இருக்க முடியாது. நம் இந்திய குடும்பங்களில் எப்போதும் பெண்கள்தான் அனுசரித்து நடந்து கொள்ள வேண்டும் என்று சொல்லி கொடுத்தே வளர்க்கிறார்கள். இந்த அனுசரணையும், தியாகமும் பெண்களை எப்போதோ சலிப்பாக்கி விட்டது.

எனவே, நீங்களும் கொஞ்சம் அனுசரித்தல், விட்டுக்கொடுத்தல் போன்றவற்றை செய்யுங்கள். காதல் மனைவியிடம் மன்னிப்பு கேட்பதில் ஒன்றும் குறைந்து விட மாட்டீர்கள். எனவே, சங்கோஜ படாமல் சரண்டர் ஆகி விடுங்கள்.

​பாராட்டுகளை அள்ளி தூவுங்கள்.

பல மனைவிகளும் தங்கள் கணவர்கள் எதற்காகவும் தனக்கான அங்கீகாரம் கொடுப்பதோ அல்லது குறைந்தபட்சம் அவர்களின் செயல்களுக்காக பாராட்டுவதோ கூட கிடையாது என்று குற்றம் சாட்டுகிறார்கள்.

எனவே, கணவன்மார்களே எப்போதும் இறுக்கமாக இல்லாமல், உங்கள் மனைவியை கொஞ்சம் பாராட்ட கற்றுக்கொள்ளுங்கள். அன்பான வார்த்தைகளால் அவர்களின் மனநிலையை சீராக்க முயற்சி செய்யுங்கள். உங்கள் மனைவி எவ்வளவு சந்தோஷமாக இருக்கிறாரோ, அவ்வளவு நீங்களும் சந்தோஷமாக இருக்கலாம்.

முதிர்ச்சியான கணவன்

பல திருமணங்களும் கணவன் மனைவி தங்களை பற்றி அறிந்து கொள்வதற்கு முன்பே நடந்துவிடுகிறது. அதனால், திருமணத்திற்க்கு பின் நடக்கும் மாற்றங்களை எதிர்கொள்வதற்கு அவர்களுக்கு தெரிவதில்லை. எனவே, முடிந்தளவு கொஞ்சம் முதிர்ச்சியான வயதில் திருமணம் செய்து கொள்ள முயற்சி செய்யுங்கள்.

இல்லையெனில் திருமண வாழ்க்கையில் ஏற்படும் நெளிவு சுழிவுகளை கையாள்வதற்கான முதிர்ச்சியை அனுபவரீதியாக எப்படி வளர்த்து கொள்வது என தெரிந்து கொள்ளுங்கள். அப்போதுதான் இருவரில் ஒருவர் மனரீதியாக சரியில்லை என்றாலும் அல்லது வாழ்க்கை பிரச்சனைகளை எதிர்கொள்ள தெரியவில்லை என்றாலும் சமாளிக்க முடியும்.

நண்பனாக இருத்தல்

பெரும்பாலான கணவர்கள் மனைவி என்றால் வீட்டில் வேலை செய்யும் இயந்திரம். கணவனுக்கு சேவை செய்யும் வேலைக்காரர் போல நினைத்து விடுகிறார்கள். அதனால்தான் நட்பாக பழக பேச வேறு நபர்களையும், குடும்ப தேவைகளுக்காக மட்டும் மனைவிகளையும் வைத்து கொள்கிறார்கள்.

முதலில் அவர்களும் மனிதர்கள் என்பதை புரிந்து கொள்ளுங்கள். உங்களுக்கு இருக்கும் அனைத்து உணர்வுகளும் அவர்களுக்கும் இருக்கும் என்பதை தெரிந்து கொள்ளுங்கள். உங்கள் மனைவியை உங்கள் முதல் நண்பர்களாக்கி கொள்ளுங்கள். அவர்களுக்கான நேரத்தை ஒதுக்குங்கள். நல்ல இணக்கத்தை உருவாக்கி கொள்ளுங்கள். அப்புறம் பாருங்க வாழ்க்கை அழகா இருக்கும்.

​நம்பிக்கை

எந்த உறவாக இருதாலும் நம்பிக்கைதான் அதன் அஸ்திவாரம். முதலில் உங்கள் பார்ட்னரின் மீதான அப்பழுக்கற்ற நம்பிக்கையை வளர்த்து கொள்ளுங்கள். அது உங்களின் வாழ்க்கையை அழகாக்கும்.

எதெற்கெடுத்தாலும் சந்தேகம் என்று சண்டை போடுவதில்தான் பல திருமண பந்தங்கள் முறிந்து போய் விடுகின்றன. எனவே, சந்தேகம் இல்லாத வாழ்க்கையை நடத்துவதற்கு வெளிப்படையான உரையாடல்களை மேற்கொள்ளுங்கள்.

​ஒன்றாக கற்று கொள்ளுங்கள்

வாழ்க்கை என்பது சாகும் வரை புதிய விஷயங்களை கற்றுக்கொண்டே இருப்பது. அதை யாரிடம் இருந்து வேண்டுமானாலும் செய்யலாம். உங்களுக்கு ஒரு விஷயம் தெரியாது என்பதற்காகவே உங்கள் மனைவிக்கும் எதுவும் தெரியாது என்று அர்த்தமல்ல.

அவரோடு சேர்ந்து உங்களுக்கு தெரியாததை கற்று கொள்ளுங்கள். உங்களுக்கு தெரிந்ததை கற்று கொடுங்கள். வாழ்க்கையை பற்றி தெரிந்து கொள்ளுங்கள். ஒருவரை ஒருவர் மதிக்க, காதலிக்க, உரையாட, அன்பு செலுத்த கற்று கொள்ளுங்கள். வாழ்க்கை சிறப்பாக இருக்கும்.

Share