ரசிகர்களின் எதிர்பார்ப்பில் மண்ணள்ளி போட்ட தல அஜித்: வலிமை புது அப்டேட் .!

அஜித் நடிப்பில் உருவாகி வரும் ‘வலிமை’ திரைப்படம் சம்பந்தமான அறிவிப்பிற்காக ஓராண்டாக காத்திருக்கின்றனர் அஜித் ரசிகர்கள். நேர்கொண்ட பார்வை திரைப்படத்திற்கு பிறகு இரண்டாவது முறையாக அஜித்தை வைத்து இந்த படத்தை இயக்கி வருகிறார்
எச்.வினோத். இந்நிலையில் மே 1 ஆம் தேதி வெளியாவதாக இருந்த வலிமை திரைப்படத்தின் பர்ஸ்ட் லுக் போஸ்டர் பற்றி முக்கியமான செய்தியை வெளியிட்டுள்ளார் தயாரிப்பாளர் போனி கபூர்.

நீண்ட காலமாக தயாரிப்பில் இருக்கும் வலிமை திரைப்படத்தில் அஜித்திற்கு ஜோடியாக பாலிவுட் நடிகை ஹூமா குரேஷி நடித்துள்ளார். போனி கபூர் தயாரிக்கும் இந்த படத்திற்கு யுவன்சங்கர் ராஜா இசையமைக்கிறார். இந்நிலையில் வலிமை திரைப்படத்தின் அப்டேட் கேட்டு நச்சரித்து கொண்டே இருந்தனர் அஜித் ரசிகர்கள். இதனால் ஒரு வழியாக வலிமை திரைப்படத்தின் பர்ஸ்ட் லுக் போஸ்டரை அஜித் பிறந்த நாளான மே 1 வெளியிடுவதாக தயாரிப்பாளர் போனி கபூர் அறிவித்தார். இதனால் மே 1 ஆம் தேதி டபுள் கொண்டாட்டத்திற்கு தயாராக இருந்தனர் அஜித் ரசிகர்கள்.

இந்நிலையில் வலிமை திரைப்படத்தின் அப்டேட் தேதி ஒத்தி வைக்கப்பட்டுள்ளதாக தெரிவித்துள்ளார் தயாரிப்பாளர் போனி கபூர். அவர் வெளியிட்டுள்ள அறிக்கையில் கூறப்பட்டிருப்பதாவது, “எங்கள் நிறுவனத்தின் சார்பில் நாங்கள் கொடுத்த முந்தைய அறிக்கையில் வருகின்ற மே 1ம் தேதி நடிகர் அஜித் அவர்களின் 50வது பிறந்த நாளை முன்னிட்டு அவரது நடிப்பில் வினோத் இயக்கத்தில் எங்கள் நிறுவனத்தின் தயாரிப்பில் உருவான வலிமை படத்தின் பர்ஸ்ட் லுக் வெளியிடுவதாக அறிவித்து இருந்தோம்.

அந்த அறிவிப்பு வெளிவரும் போது கொரோனா நோயின் 2வது அலை வரும் என்றோ, அதன் தாக்கம் சுனாமி போல தாக்கும் என்றோ சிறிதும் எதிர்பார்க்கவில்லை. இந்த தருணத்தில் தேசமெங்கும் எண்ணற்றோர் பொருளாதாரம் இழந்து, உற்றார் உறவினர் உயிர் இழந்து, நோய் பற்றிய பீதியிலும் அதிர்ச்சியிலும் ஆழ்ந்து இருக்கின்றனர்.

இத்தகைய அசாதாரண சூழ்நிலையில் ஜீ ஸ்டூடியோஸ், பே வியூ ப்ரொஜெக்ட்ஸ், இப்படத்தில் நடித்து உள்ள கலைஞர்கள், பணியாற்றிய தொழில் நுட்ப கலைஞர்கள் அனைவரும் ஒன்றிணைந்து எடுத்து உள்ள முடிவின் படி வலிமை படத்தின் ஃபர்ஸ்ட் லுக் வெளியீடு மற்றுமொரு தேதிக்கு தள்ளி வைக்கப்படுகிறது.

நாம் அனைவரும் ஒன்றிணைந்து அனைவரின் நலத்துக்காகவும், பாதுகாப்புக்காகவும் பிரார்த்திப்போம்” இவ்வாறு அதில் தெரிவிக்கப்பட்டுள்ளது. போனி கபூரின் இந்த திடீர் அறிவிப்பால் நீண்ட காலமாக வலிமை திரைப்பட அப்டேட்காக காத்திருந்த அஜித் ரசிகர்கள் கடுப்பில் உள்ளனர்.